ပဲစောင်းလျားသီးသုပ်

ပါဝင်ပစ္စည်းများ

1. ပဲစောင်းလျားသီး
2. နှမ်း
3. ကြက်သွန်နီဥကြီးတစ်လုံး
4. ဆား
5. ကြက်သွန်နီဆီချက်
6. ငရုတ်သီး အကျက်မှုန့်
7. သံပုရာသီးတစ်စိတ်

ပြင်ဆင်ပြုလုပ်ပုံ

1. ပဲစောင်းလျားသီးတွေကို ရေစင်စင်ဆေး၊ ထိပ်နှစ်ဘက်ကို ဖြတ်ပြီး အကြောသင်ထားပါတယ်။
   
   
   
   
   
2. အိုးတစ်လုံးထဲကို ရေထည့်ပြီး ဆူအောင်တည်ထားလိုက်ပါတယ်။
   
   
   
   
   
3. ရေနွေးအိုးတည်ထားခိုက် နှမ်းထောင်းထားပါတယ်။ ဒီမှာတော့ ကြိတ်စက်နဲ့ ကြိတ်တယ်ပေါ့လေ။ ပုံမှာပြထားတဲ့ဇွန်းနဲ့ ၃ ဇွန်းကြိတ်ပါတယ်။ ညက်မှုန့်နေအောင် မကြိတ်ပါဘူး။ အလုံးကွဲရုံလေးကြိတ်တာပါ။
   
   
   
   
   
4. ရေနွေးပွက်ပွက်ဆူထဲကို ပဲစောင်းလျားသီးတွေထည့်ပြီး ၃ မိနစ်ခန့်ထားပါတယ်။ ထို့နောက်ဆယ်ပြီး ရေခဲရေနဲ့ ခဏစိမ်လိုက်ပါတယ်။ အစိမ်းရောင်တွေ မပျောက်အောင်နဲ့ အနည်းငယ် ကြွပ်နေအောင်ပါ။
   
   
   
   
   
5. ကတ်ကြေးနဲ့ အနေတော်လေးတွေ ညှပ်ထားပါတယ်။
   
   
   
   
   
6. ကဲ သုပ်တော့မယ်ဆိုတော့ ညှပ်ထားတဲ့ ပဲစောင်းလျားသီးတွေကို ကြက်သွန်နီ ပါးပါးလှီး၊ ကြက်သွန်နီဆီချက်၊ နှမ်းထောင်း၊ ငရုတ်သီးအကျက်မှုန့်၊ ဆားအနည်းငယ်ထည့်ပြီး သံပုရာရည်ညှစ်ထည့်ကာ နယ်လိုက်ရုံပါပဲ။
   
   
   
   
   
7. လှလှပပလေး ဖြစ်သွားအောင် အပေါ်ကနေ ကြက်သွန်နီဆီချက် ဖြူးပြီးရင်တော့ သုံးဆောင်လို့ရပါပြီရှင်။
   

_______

ငြိမ်း